කොරෝනා වෛරසයෙන් වැඩිම අවදානමක් ඇති වූයේ එම වෛරසය ව්‍යාප්තියෙන් 04,05 සහ 06 වන සතිවල බවත් දැන් ලංකාව සිටින්නේ 05 වන සතියේ නිසා අප්‍රේල් මස 25 වැනිදා වන විට රටටම යම් සුබ ආරංචියක් ලබාදීමට හැකිවනු ඇති බවත් යුද හමුදාපති ලුතිනන් ජෙනරාල් ශවේන්ද්‍ර සිල්වා මහතා පවසනවා.ඒ මහතා ජනතාවගෙන් ඉල්ලා සිටින්නේ ඒ සඳහා දැඩි පරිශ්‍රමයකින් කටයුතු කරන සෞඛ්‍ය අංශ, යුද හමුදාව, පොලිසිය ඇතුළු සියලු කණ්ඩායම් වලට උපරිම සහයෝගය දෙන ලෙසත් ඉදිරි සති දෙක ඇතුළත නිවාසවලටම වී සිටිමින් සියළු සෞඛ්‍ය ආරක්ෂිත ක්‍රම පිළිපඳින ලෙසත් ය.
ජනතාවට මෙහි බැරෑරුම්කම තේරුම් ගැනීමට සියළු දත්ත ඔවුන් අතරට පත් විය යුතු බවත් දැනට නිරෝධායනය වන පිරිස් සහ ඔවුන් ඇසුරු කළ පිරිස් සියල්ල පරීක්ෂා කරන තුරු වෛරසය පැතිර යාම වැළැක්වීම ගැටළුසහගත තත්ත්වයක පවතින බවත් ඔහු වැඩි දුරටත් කියාසිටියා.
