අත්‍යාවශ්‍ය සේවා, ආහාර හා ඖෂධ සැපයුම් ආදිය සඳහා ඇඳිරි නීති බලපත්ර නිකුත් කිරීම නිසි පරිදි ක්‍රියාත්මක නොවන බව පෙනී ගිය හෙයින් මෙම බලපත්ර නිකුත් කිරීම සම්බන්ධයෙන් වැඩබලන පොලිස්පති සි. ඞී. වික‍්‍රමරත්න මහතා උපදෙස් මාලාවක් නිකුත් කර තිබෙනවා. ඇඳිරි නීති බලපත්ර ලබා ගැනීමට සෑම පොලිස් ස්ථානයකම දිගු පෝලිම් පවතින බැවින් එම තත්ත්වය මඟ හරවා ගැනීමට එහි උපදෙස් මාලාවක් දී තිබෙනවා.
ඒ අනුව පොලිස් පරීක්ෂකවරයා, ස්ථානාධිපතිවරයා හෝ වෙනත් වගකිව යුතු නිලධාරියෙකු අදාළ ආයතන වෙත පෞද්ගලිකවම ගොස් එහි සේවා පවත්වාගෙන යාමට අවශ්‍ය සේවක සංඛ්‍යාව හඳුනාගෙන සේවකයින් වෙන වෙනම ඇඳීරි නීති බලපත්ර නිකුත් කළ යුතු බවයි එහි සඳහන් වන්නේ.
- ලංකා විදුලිබල මණ්ඩලය,
- ලංකා විදුලි සමාගම,
- ජාතික ජලසම්පාදන හා ජලාපවාහන මණ්ඩලය
- ශ‍්‍රී ලංකා ටෙලිකොම් ආයතනය, ලංකා ගමනාගමන මණ්ඩලය,
- ශ‍්‍රී ලංකා දුම්රිය සේවය,
- ශ‍්‍රි ලංකා තැපැල් සේවය,
- රජයේ මුද්‍රණාලය,
- ලංකා ඛණිජ තෙල් නීතිගත සංස්ථාව ඇතුළු ඉන්ධන සැපයීමේ සේවා සහ අත්‍යවශ්‍ය සේවා පවත්වාගෙන යනු ලබන වෙනත් ආයතන
- පළාත් පාලන ආයතනවල නියෝජිතයින්ට සහ ඒවායේ සේවකයින්
- ශ‍්‍රී ලංකා මහ බැංකුව,
- මහා භාණ්ඩාගාරය,
- සියලූ වාණිජ බැංකු
- රක්ෂණ ආයතනවල සේවකයින්
- පිරිසිදු කිරී මේ හා සනීපාරක්ෂක සේවා සඳහා අවසර දී ඇති සියලූ ආයතනවල සේවකයින්
- රජයට අනුබද්ධ හෝ පෞද්ගලික ආරක්ෂක සමාගම්වල සේවකයින්
- ලංකා සතොස හා සෙසු සුපිරි වෙළඳසැල්වල කාර්යය මණ්ඩලය
- ආහාර හෝ භාණ්ඩ ප‍්‍රවාහන වාහන හා රියදුරන්
- බේකරි ආහාර හෝ වෙනත් ක්ෂණික ආහාර නිවෙස්වලට බෙදා හරින තැනැත්තන්
- වී, එළවළු, පළතුරු, තේ, රබර්, පොල්, සුළු අපනයන භෝග හෝ පැළ තවාන් ආදී කෘෂිකර්ම කටයුතු සිදුකරන සහ ඒ ආශ්රිත බීජ, පැළ, පොහොර හෝ රසායනික ද්‍රව්‍ය හෝ නිෂ්පාදනය කරන හා බෙදාහරින තැනැත්තන්
- මස්, මාළු, කිරි, බිත්තර හා වෙනත් සත්ත්ව ආශ්රිත නිෂ්පාදනය කරන හෝ ප‍්‍රවාහනය කරන තැනැත්තන්
- ඖෂධ නිවෙස්වලට බෙදා හැරීම සඳහා සෞඛ්‍ය අමාත්‍යංශය විසින් අනුමත කර ඇති රජයේ ඔසුසැල්, ෆාමසි හා බලයලත් වෙනත් ආයතනවල සේවකයින්
