පසුගිය ඔක්තෝබර් අග ඇති වූ 'ඔර්නබ්' සුළි කුණාටුව සහ නොවැම්බර් මුලදී ඉන්දියාවේ ආන්ද්‍රා ප්‍රදේශ් වෙත බලපෑ 'මුරසු' චණ්ඩ සුළි කුණාටුවෙන් පසුව කලාපය තුළ ඇති වන නවතම කැළඹිලි ස්වභාවය මෙයයි.
දකුණු අන්දමන් මුහුද ආශ්‍රිතව දැනට පවතින ඉහළ වායුගෝලීය කැළඹිලි ස්වභාවය, ඉන්දීය කාලගුණ විද්‍යා දෙපාර්තමේන්තුව (IMD) ඇතුළු නිල මූලාශ්‍ර පෙන්වා දෙන පරිදි සිකුරාදා (නොවැම්බර් 13) වන විට ශ්‍රී ලංකාවට ඊසාන දෙසින් වූ ගිනිකොණදිග බෙංගාල බොක්කේ අඩු පීඩන කලාපයක් බවට පත්වීමට ඉඩ තිබේ. අනතුරුව වයඹ දෙසට ගමන් කරන මෙම පද්ධතිය නොවැම්බර් 14 වන විට පැහැදිලි අඩු පීඩන කලාපයක් ලෙසත්, නොවැම්බර් 15 වන විට පීඩන අවපාතයක් දක්වාත් තීව්‍ර වනු ඇතැයි අපේක්ෂා කෙරේ.
මීට පෙර ඇති වූ 'දිට්වා' සුළි කුණාටුව දිවයින හරහා ගමන් කළ නමුත්, මෙම නව පද්ධතිය ගොඩබිමට ඇතුළු නොවී ශ්‍රී ලංකාවේ නැගෙනහිර වෙරළ තීරයට ආසන්න මුහුදු ප්‍රදේශය ඔස්සේ කෙළින්ම උතුරු දෙසට ගමන් කරනු ඇතැයි දැනට පවතින පුරෝකථන මගින් පෙන්නුම් කරයි. විවිධ කාලගුණික ආකෘති මගින් පද්ධතිය වෙරළට ඉතා සමීපයෙන් හෝ තරමක් ඈතින් ගමන් කරන බවට විවිධ දත්ත පෙන්වුවද, එය පීඩන අවපාතයක් වූ පසු නිශ්චිත ගමන් මාර්ගය තහවුරු කර ගත හැකි බව අධ්‍යක්ෂ ජනරාල්වරයා පවසයි. නොවැම්බර් 14 වැනිදා සිට නැගෙනහිර වෙරළට ආසන්නව ගමන් කරන මෙම පද්ධතිය නොවැම්බර් 16 වන විට උතුරු ප්‍රදේශයට සමීප වෙමින් ඉන්දියානු වෙරළ දෙසට ගමන් කිරීමට නියමිත අතර, මුහුදේදී එක තැන රැඳී වර්ධනය නොවුණහොත් එය සුළි කුණාටුවක් දක්වා වර්ධනය නොවනු ඇතැයි දෙපාර්තමේන්තුව විශ්වාස කරයි.
නොවැම්බර් 14 සිට 16 දක්වා පද්ධතියේ ඍජු බලපෑම හේතුවෙන් නැගෙනහිර, උතුරු, උතුරු මැද සහ වයඹ පළාත්වල වර්ෂාපතනය කැපී පෙනෙන ලෙස ඉහළ යනු ඇත. විශේෂයෙන්ම මඩකලපුව, අම්පාර සහ ත්‍රිකුණාමලය යන දිස්ත්‍රික්කවලට ඇදහැලෙන තද වැසි සමඟ ඇතැම් ස්ථානවල ක්ෂණික ජල ගැලීම් ඇතිවීමේ අවදානමක් පවතී. මීට අමතරව වයඹ දෙසින් හමන සුළං ප්‍රවාහයන් සමඟ ජල වාෂ්ප ඇදී ඒම හේතුවෙන් බස්නාහිර, සබරගමුව සහ දකුණු පළාත්වලට ද වැසි තත්ත්වයේ වැඩිවීමක් අපේක්ෂා කෙරේ.
මෙම පීඩන අවපාතය දිවයිනෙන් ඉවතට ගමන් කිරීමෙන් පසුව වුවද, නොවැම්බර් මාසය අවසන් වන තෙක් ඉදිරි සති දෙක තුනක කාලය පුරා දිවයිනේ බොහෝ ප්‍රදේශවලට සාමාන්‍යයෙන් පවතින ප්‍රමාණයට වඩා වැඩි වර්ෂාපතනයක් ලැබෙනු ඇත. පවතින අන්තර් මෝසම් කාලගුණික තත්ත්වය යළි සක්‍රීය වීමත්, ගෝලීය වශයෙන් බලපාන එල්නිනෝ (El Niño) සාධකයත් හේතුවෙන් තෙත් කලාපය ඇතුළු ප්‍රදේශ රැසකට ඉතා කෙටි කාලයක් තුළ ඇදහැලෙන තීව්‍ර වැසි තත්ත්වයන් ඇති විය හැකි බැවින් මහජනතාව ඒ පිළිබඳව දැඩි අවධානයෙන් පසුවිය යුතුය.
නොවැම්බර් මාසය අවසන් වීමත් සමඟ දැනට පවතින අන්තර් මෝසම් රටාව නිමාවී ලබන දෙසැම්බර් මාසයේ සිට දිවයිනට ඊසානදිග මෝසම සක්‍රීය වීමට නියමිතය. දකුණු ආසියානු දේශගුණික දැක්ම සංසදයේ (SASCOF) පුරෝකථන උපුටා දක්වමින් අජිත් විජේමාන්න මහතා සඳහන් කළේ, එළඹෙන දෙසැම්බර් මාසයේදී උතුරු සහ නැගෙනහිර පළාත්වලට සාමාන්‍ය අගයට වඩා මඳක් වැඩි වර්ෂාපතනයක් අපේක්ෂා කරන බවයි. කෙසේ වෙතත්, ඊසානදිග මෝසම ආරම්භ වී ඊසාන දෙසින් සුළං හැමීමත් සමඟ බස්නාහිර සහ සබරගමුව යන පළාත්වලට දෙසැම්බර් මාසය තුළ සාමාන්‍යයෙන් ලැබෙන වර්ෂාපතනයට වඩා අඩු වැසි තත්ත්වයක් ඇතිවීමට ඉඩ ඇති බවටද පුරෝකථනය කර තිබේ.
