මේ අනුව, නව ආණ්ඩුවේ අග්‍රාමාත්‍ය ධුරය සඳහා හිටපු හමුදා ප්‍රධානී ගාඩි අයිසන්කොට්ගේ නම යෝජනා කිරීමට විපක්ෂ නායකයන් තීරණය කර ඇත. අයිසන්කොට් මෙහෙයවන මෙම සන්ධානය සඳහා යාර් ලපිඩ්ගේ ‘යෙෂ් අටිඩ්’, අවිග්ඩෝ ලයිබර්මන්ගේ ‘ඊශ්‍රායල් බෙයිටෙනු’ සහ යාරී ගෝලාන්ගේ ‘ප්‍රජාතන්ත්‍රවාදී’ යන පක්ෂවලට අමතරව හිටපු අගමැති නෆ්තාලි බෙනට්ගේ ආධාරය ද හිමිව තිබේ. මැතිවරණ හමාර වීමෙන් පසු ප්‍රධාන විපක්ෂ නායකයන් මෙසේ එක්ව සාකච්ඡා පැවැත්වූ ප්‍රථම අවස්ථාව මෙය ලෙස සැලකේ.
මෑතකදී නිමාවට පත් වූ ඊශ්‍රායල මහ මැතිවරණයේදී කිසිදු දේශපාලන කඳවුරකට පැහැදිලි බහුතරයක් ලබාගැනීමට නොහැකි විය. ආසන 120කින් සමන්විත නෙසට් පාර්ලිමේන්තුවේ බලය පිහිටුවීම සඳහා ආසන 61ක අවම බහුතරයක් අවශ්‍ය වේ. ඡන්ද ප්‍රතිඵලවලට අනුව නෙතන්යාහුගේ පාර්ශ්වයට ආසන 53ක් ද, අයිසන්කොට් ප්‍රමුඛ විපක්ෂ එකමුතුවට ආසන 48ක් ද හිමිව ඇති අතර අරාබි දේශපාලන පක්ෂ ආසන 19ක් ලබාගෙන ඇත.
නැවත මැතිවරණයකට නොගොස් වහාම රජයක් අලුතින් පිහිටුවන ලෙස ජනාධිපති අයිසැක් හර්සොග් ඉල්ලීමක් කර ඇති නමුත්, පාර්ලිමේන්තු බහුතරය තහවුරු කරගැනීමට නම් දෙපාර්ශ්වයටම අරාබි පක්ෂවල සහාය ලබාගැනීමට සිදුවේ. කෙසේ වෙතත්, අරාබි පක්ෂ සමඟ මෙතෙක් කිසිදු පාර්ශ්වයක් නිල මට්ටමේ සාකච්ඡා ආරම්භ කර නොමැත.
