පොසොන් පොහොය දිනයේ අනුරාධපුර අටමස්ථාන පූජා භූමියට විශේෂ ආරක්ෂාව සපයමින් සිටි උඩමළුව පොලීසියේ නිලධාරින් පිරිසකට සැකකාර මුස්ලිම් ජාතික කාන්තාව ජය ශ්‍රී මහ බෝධියට ඇතුල්වීම සඳහා උත්සාහ කරද්දී පරික්ෂාවට ලක්කර තිබූ අතර ඇයගේ ගමන් මල්ලේ අගල් දෙකකට වඩා දිගින් යුතු තියුණු මුවහත ඇති තහනම් පිහියක් තිබී හමුවූ බව පොලීසිය පවසනවා.
ඊට අමතරව තවත් සැකකරුවෙකු රුවන්වැලිසෑයේ සිට ශ්‍රී මහ බෝධිය දක්වාවූ පෙත්මග ඔස්සේ ශ්‍රී මහ බෝධියට ඇතුල්වන දෙවන ආරක්ෂක වලල්ල පසුකිරීමට උත්සාහ කළ අවස්ථාවේ අත්අඩංගුවට ගෙන තිබුණා. එම සැකකරුගෙන් සිදුකල ප්‍රශ්න කිරිම් වලදී තරුණියක් ඔහුට දුරකථන අංකයක් ලබාදුන් බවත් ඇය ශ්‍රී මහ බෝධිය ආසන්නයේ සිටින බැවින් ඇය හමුවීමට උත්සාහ කළ බවත් පොලීසියට පවසා තිබුනා.
අත්අඩංගුවටගත් කාන්තාව වයස අවුරුදු 38ක් හා පිරිමි පුද්ගලයා වයස අවුරුදු 35ක අයවළුන් බව වාර්තාවනවා.
මෙම සිද්ධි දෙක සිදුවන අවස්ථාවේ අත්බෑගයක් සමග පුද්ගලයෙකු සෙනඟ අතරින් දිව පළාගිය බවට පොලීසියට තොරතුරු ලැබී තිබූ අතර එහෙත් කිසිදු අයෙකු අත්අඩංගුවට පත්නොවු බවයි පොලීසිය පවසන්නේ. මෙම සැකකරුවන් අත්අඩංගුවට පත්වන අවස්ථාවේ පොසොන් පොහොය උත්සවය සඳහා විශාල පිරිසක් අනුරාධපුර පූජා භූමියට පැමිණ සිටි බවත් කිසිදු කලබලයක් සිදුනොවන ආකාරයෙන් සැකකරුවන් අත්අඩංගුවටගත් බවත් පොලීසිය පැවසුවා.
ඔවුන් සම්බන්ධයෙන් අනුරාධපුර මූලස්ථාන පොලීසිය වැඩිදුර පරික්ෂණ සිදුකරනවා.
