මෑතකදී සමාජ මාධ්‍ය තුළ දැඩි කතාබහට ලක්වෙමින් ජනප්‍රිය වූ ‘යක්ෂ රාජ වජිරපාණි’ නමැති ආන්දෝලනාත්මක පද්‍ය නිර්මාණය සම්බන්ධයෙන් එහි රචක හිමියන් විසින් විශේෂ තොරතුරු රැසක් හෙළිදරව් කර තිබේ. යූටියුබ් නාලිකාවක් සමග පැවැති සාකච්ඡාවකට එක්වෙමින් උන්වහන්සේ සඳහන් කළේ, දැනට ප්‍රසිද්ධියට පත්ව ඇත්තේ මෙම සමස්ත නිර්මාණ ව්‍යාපෘතියේ එක් අදියරක් පමණක් බවත්, ඉදිරියේදී මෙහි තවත් ප්‍රබල කොටස් පහක් එළිදැක්වීමට කටයුතු යොදා ඇති බවත්ය.
මෙම කාව්‍ය නිර්මාණය බිහිවූ ආකාරය පැහැදිලි කළ රචක හිමියන්, බන්ධනාගාරගත කර සිටි පූජ්‍ය ගලගොඩඅත්තේ ඥානසාර හිමියන් සිවුරු රහිතව ගිහි ඇඳුමෙන් අධිකරණය හමුවට පමුණුවන ආකාරය දැකීමෙන් තමන් දැඩි ලෙස සංවේගයට පත්වූ බව ප්‍රකාශ කළහ. ඉන් පසුව, රට, ජාතිය මෙන්ම ශාසනය කෙරෙහි ලැදියාවක් දක්වන පිරිසක් සමග සිදුකළ දීර්ඝ සාකච්ඡාවල ප්‍රතිඵලයක් ලෙස එම හැඟීම් පදනම් කරගනිමින් මෙම පද්‍ය පංතිය නිර්මාණය කළ බව උන්වහන්සේ පෙන්වා දුන්හ.
මෙහි අන්තර්ගතය පිළිබඳව වැඩිදුරටත් අදහස් දැක්වූ උන්වහන්සේ, තේරවාදී මෙන්ම මහායාන බෞද්ධ සාහිත්‍යයේ එන ‘වජ්‍රපාණී’ සංකල්පය මෙයට පාදක කරගත් බව පැවසූහ. විශේෂයෙන්ම සච්චක සූත්‍රයේ එන සච්චක තමාගේ පරාජය පිළිගැනීමට මැලි වූ අවස්ථාවේදී, බුදුරජාණන් වහන්සේට උපකාර පිණිස ශක්‍ර දේවේන්ද්‍රයා වජ්‍රපාණී වේශයෙන් පෙනී සිටීමේ පුවත මෙම නිර්මාණයට ප්‍රධාන තේමාව සැපයූ බව උන්වහන්සේ විස්තර කළහ.
ඇතැම් පිරිස් මෙය ‘වස් කවියක්’ ලෙස හඳුන්වමින් නොසන්සුන් වීම සම්බන්ධයෙන් අදහස් දැක්වූ උන්වහන්සේ, මෙම නිර්මාණයෙන් යම් කෙනෙකු කලබලයට පත්වන්නේ නම් ඉන් ගම්‍ය වන්නේ ‘පුහුල් හොරා කරෙන් දැනේ’ යන න්‍යායට අනුව ඔවුන්ගේම හෘද සාක්ෂියේ ඇති වරදකාරීත්වය පමණක් බව සඳහන් කළහ. එමෙන්ම, මහ සංඝරත්නයට හා චීවරයට නිගා කරමින්, අසත්‍ය ප්‍රකාශ හරහා බලයට පැමිණ ක්‍රියාකරන පාර්ශ්වයන්ට එරෙහිව නැගුණු සාධාරණ හඬක් මෙහි ගැබ්ව ඇති බව ද උන්වහන්සේ අවධාරණය කළහ.
මෙම නිර්මාණයේ සංගීත නිෂ්පාදනය සහ සමාජගත කිරීම පිටුපස ප්‍රකට සංගීත ශිල්පී ඉරාජ් වීරරත්න සිටින්නේදැයි මාධ්‍යවේදියා නැගූ ප්‍රශ්නයට උන්වහන්සේ සෘජු පිළිතුරක් ලබා නොදුන් අතර, ඉරාජ් යනු රට වෙනුවෙන් විශාල මෙහෙවරක් කළ අයෙකු බවත්, ඒ පිළිබඳව ඔහුගෙන්ම විමසා දැනගත හැකි බවත් ප්‍රකාශ කරමින් ඉරාජ්ගේ යම් සබඳතාවක් ඇති බවට ඉඟියක් පළ කළහ.
දැනට සමාජ මාධ්‍ය ඔස්සේ ප්‍රචාරය වී ඇත්තේ මුළු නිර්මාණයේ ඉතා කුඩා කොටසක් (Iceberg) පමණක් බව පෙන්වා දුන් උන්වහන්සේ, ඉදිරියේදී නිකුත් කිරීමට නියමිත ඉතිරි කොටස් පහ හරහා සමාජය තුළ විශාල පිබිදීමක් සහ විප්ලවීය වෙනසක් ඇතිවනු ඇතැයි අපේක්ෂා කරන බව වැඩිදුරටත් කියා සිටියහ.
