කොවිඩ් වෛරසය ආසාදිතයින් විශාල වශයෙන් වාර්තා වීම නිසා ඔවුන්ට ප්‍රතිකාර කිරීම ඉදිරියේ දී අභියෝගයක් විය හැකි බව සෞඛ්‍ය අමාත්‍යාංශයේ නියෝජ්‍ය සෞඛ්‍ය අධ්‍යක්ෂ ජනරාල්වරයා පවසනවා. මේ වන විට හමුවන කොවිඩ් ආසාදිතයින්ගෙන් 50%ක්ම ඔමික්‍රෝන් ආසාදිතයින් බව ඔහු පවසනවා. මෙම ඔමික්‍රෝන් ප්‍රභේදය ප්‍රතිශක්තිය හීන වූ පුද්ගලයින්ට ආසාදනය වුවහොත් සංකූලතා වැඩිවීම සහ මරණයට පත්වීමේ ඉඩ කඩ වැඩි බව ඔහු අවධාරණය කර සිටිනවා. එසේම ඔමික්‍රෝන් ආසාදිතයින් මෙන්ම ඩෙල්ටා ප්‍රභේදය ආසාදිතයින් ද බහුලව හමුවන බවයි නියෝජ්‍ය සෞඛ්‍ය අධ්‍යක්ෂ ජනරාල්වරයා පවසන්නේ. ඒ හේතුව නිසා තත්ත්වය තවත් භයානක වී තිබෙනවා.
මේ අතර ජාතික බෝවන රෝග විද්‍යායතනයේ (IDH) ධාරිතාව ඉක්මවා යමින් පවතින බව එහි අධ්‍යක්ෂකවරයා ප්‍රකාශ කරනවා. දැඩි සත්කාර ඒකකයට සහ ඔක්සිජන් අවශ්‍යතාවය ඇතිවන රෝගීන් ගේ සංඛ්‍යාව ඉතා ඉහළ ගොස් තිබෙන බවයි අධ්‍යක්ෂකවරයා පවසන්නේ. විශාල රෝගීන් සංඛ්‍යාවක් දිවයිනේ සෑම ප්‍රදේශයකින්ම ඉදිරි සති දෙක ඇතුළත හමුවිය හැකි බවයි අධ්‍යක්ෂකවරයා අනතුරු අඟවා සිටින්නේ.
