ශ්වසන මාර්ගයේ ඇති වූ ආබාධයක් හේතුවෙන් මීගමුව රෝහලට ඇතුළත් කල මීගමුව බන්ධනාගාරයේ රැඳවියෙක් එහි 8වන මහලෙන් ඇද වැටී මියගොස් ඇති බවට වාර්තා වනවා.
මෙම රැඳවියා බන්ධනාගාර නිලධාරීන් දෙදෙනෙකුගේ ආරක්ෂාව යටතේ රෝහලවෙත ඇතුළත් කර තිබෙනවා. ඊයේ රාත්‍රී 12.30ට පමණ මෙම රැඳවියා අතුරුදහන් වී ඇති බවට අනාවරණය වීමත් සමඟම පොලිසිය සහ රෝහලේ ආරක්ෂක නිලධාරින් ඒ පිළිබඳව සොයා බලන අවස්ථාවේදී මෙම රැඳවියාගේ මියගිය දේහය හමුවී ඇති බව සඳහන්.
වයස අවුරුදු 34ක්වන මෙම රැඳවියා බන්ධනාගාරගත කර ඇත්තේ හෙරොයින් වරදකට සම්බන්ධවයි. ඔහුට කොරෝනා වෛරසය වැළඳී ඇති දැයි පරීක්ෂා කිරීමට මීගමුව රෝහලට ඇතුළත් කර තිබෙන බව සඳහන්. ඔහුගේ PCR පරීක්ෂණ වාර්තා අද ලැබිමට නියමිතයි.
