අමෙරිකාවේ මේ වන විට ඉතා ප්‍රචණ්ඩ ලෙස ව්‍යාප්තවන උද්ඝෝෂණවලට ප්‍රධාන හේතුව වූ කළු ජාතික ජෝර්ජ් ෆ්ලොයිඩ් ඝාතනය කිරීමේ වරදට පොලිස් නිලධාරී ඩේව් චව්වින්ට චෝදනා ගොනු කර තිබුණේ මෙම තුන් වන මට්ටමේ අර්ථ දැක්වීම අනුවයි.
එහෙත් මෙ වන විට ඔහුසම්බන්ධයෙන් වූ චෝදනාව වෙනස් කරමින් ඔහුට දෙවන මට්ටමේ අර්ථ දැක්වීම අනුව චෝදනා ගොනු කර ඇති බව වාර්තා වනවා. මනුෂ්‍ය ඝාතනයක් සම්බන්ධයෙන් අමෙරිකාවේ නීතියට අනුව දෙවන මට්ටමේ අර්ථ දැක්වීම වන්නේ ද්වේශ සහගත චේතනාවකින් එහෙත් කලින් සැලසුම් නොකල මනුෂ්‍ය ඝාතන ලෙසයි.
කෙසේ වෙතත් මියගිය ජෝර්ජ් ෆ්ලොයිඩ්ගේ පවුලේ සාමාජිකයින් කියා සිටින්නේ ඔහුව මරා දැමූ පොලිස් නිලධාරියාට පළමු මට්ටමේ මනුෂ්‍ය ඝාතනයක් සම්බන්ධයෙන් චෝදනා නැගිය යුතු බවයි. පළමු මට්ටමේ චෝදනාවකට අනුව එය අර්ථ දැක්වෙන්නේ ද්වේශ සහගත ලෙස හිතාමතාම කලින් සැලසුම් කල පරිදි සිදුවන මනුෂ්‍ය ඝාතනයක් ලෙසයි.
ජෝර්ජ් ඝාතනය කළ පොලිස් නිලධාරියා සමඟ සිටි අනෙකුත් නිලධාරීන් තුන් දෙනාට මින් පෙර කිසිදු චෝදනාවක් එල්ල වී නොතිබුණත් මෙම සංශෝධනයේ දී දෙවන මට්ටමේ මනුෂ්‍ය ඝාතනයකට අනුබල දීම සහ ආධාර ලබා දීම යන චෝදනා යටතේ නඩු ගොනුකර තිබෙනවා.
