රටේ ජාතික ආරක්ෂාව වෙනුවෙන් පැනවූ මෙම නීතියට පටහැනිව ක්‍රියාකරන ඇතැම් මුස්ලිම් කාන්තාවන් පවසා තිබෙන්නේ ඔවුන් බොහෝ කාලයක් තිස්සේ මුහුණු වසාගෙන මාර්ගවල ගමන් කළ නිසා මුහුණ නිරාවරණය කරගෙන යෑමේදී යම් අපහසුවක් දැනෙන බවත් එක්වරම බුර්කාව,නිකාබය වැනි පලඳනාවලින් ඉවත්වීමට නොහැකි බවත්, වසර ගණනාවක් තිස්සේ මුහුණ වසාගෙන ගොස් එක් වරම මුහුණ නිරාවරණය කරගෙන යාම නිරුවතින් පාරේ යනවා වගේ යනුවෙන් බවත්ය.
මෙම හේතූන් නිසා බුර්කාව හා නිකාබය නොමැතිව කටයුතු කිරීමට හුරුවෙන්න එම කාන්තාවන්ට ටික කලක් ගත වන බවත් එය වරදක් ලෙස නොසැලකිය යුතු බවත් මුස්ලිම් ආගමික කටයුතු දෙපාර්තමේන්තුවේ අධ්‍යක්‍ෂ එම්.ආර්.එම්.මලික් මහතා සඳහන් කරනවා. කෙසේ නමුත් රජය විසින් නිකුත් කර තිබෙන ගැසට් නිවේදනයට අනුව මුහුණු ආවරණ තහනම් කරමින් කටයුතු කරන ලෙස සියලුම මුස්ලිම් කාන්තාවන්ගෙන් ඉල්ලා සිටින අතර රජය පනවන ඕනෑම නීතියකට අවනතවීමට මුස්ලිම් සමාජය සූදානම් බවද එම මහතා පවසනවා.
