රජය විසින් ඉන්ධන මිල ඉහළ දැමීම හේතුවෙන් ත්‍රී රෝද රථ ගාස්තුවල මිල ගණන්ද ඉහළ නැංවීමට තීරණය කර ඇති බව ත්‍රී රෝද රථ රියදුරන්ගේ සංගමය පවසයි. ඒ අනුව පළමු කිලෝමීටරයට රුපියල් 50 ක්ව පැවති ගාස්තුව අද (11දා) සිට රුපියල් 60 ක් වනු ඇති. මේ අතර ඩීසල් මිල වැඩි කිරීම නිසා බස් ගාස්‌තු වැඩිකරනවාද නැද්ද යන්න අද (11දා) තීරණය කරන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විඡේරත්න ඊයේ (10දා) පැවැසීය.
ඩීසල් මිල වැඩි කිරීමේ ප්‍රතිශතය අනුව බස් ගාස්‌තු වැඩිකරන ප්‍රමාණය සංගමයේ නිලධාරීන් විසින් අද පෙරවරුවේ සාකච්ඡා කර ඒ පිළිබඳ තීරණය ප්‍රකාශ කරන බවද හෙතෙම කීය. බස් ගාස්‌තු වැඩිකිරීම සඳහා වාර්ෂිකව ක්‍රියාත්මක කරන ගාස්‌තු සංශෝධනය ජුලි මාසයේදී සිදුකිරීමට නියමිත බවත් එයද සැලකිල්ලට ගෙන බස් ගාස්‌තු සම්බන්ධයෙන් අවසන් තීරණය අද ප්‍රකාශ කරන බවත් ඒ මහතා වැඩිදුරටත් පැවැසීය.
